一杆一車好正常

    一杆一車好正常 

    橫衝直撞搵來傷

    停車出口人遠走

    非常司機無厘頭

    澳門汽車有增無減，中區車位僧多粥少，泊車越來越難，有住和隆街、柿山、白馬行一帶的車主，經常見彼等頻在該區兜圈，車牌見慣，車主熟口熟面，差在唔知閣下姓乜，住喺邊忽。

    白馬行有個十皮停車場，若以為方便，話泊就泊，咁咪好冇面？蓋因此車場繁忙時間經常爆滿，特別是下午，等位車龍排至近行人路，有些車輛圖死等，半架車身阻成條街，導致響安催促聲不絕。

    此停車場同其他場一樣，一杆一車，惟最近見有人竟一杆走兩車，此大懵初哥為貨斗司機，見有一車起杆即入，此司機連票也未竟照衝，結果支杆打在車頂上，佢竟用力推高攔杆，搞到支杆梗晒，架車進退維谷，還累及尾後等過的車龍。

    收銀員見大件事，即call上司班師傅救駕，十分鐘才有人趕到，即時拆除攔杆，要人手寫飛，然而那司機仍話佢冇衝杆，收銀阿叔眞係簫都畀佢吹鬈。唔使問阿貴，司機要賠壞杆錢，賠幾多，佢至知矣。

    此停車場時有怪現象，日前，有架白色私家車竟將車駛入停車場出口中段，車主唔知去邊，出口被塞，幾架離場車輛動彈不得，此番收銀阿姨就有點發茅，唔知點搵車主。

    此停車場行車設計靠右行駛，常客知頭知路，然而有等生客仍按街中慣例左上右落，幾乎轉角與來車相撞，好心車主勸其靠右行駛，但有人卻使銅銀夾大聲，媽對方唔識揸車，惡過條蛇。從後睇到此情景，得啖笑，但願此惡人自行收歛，免日後揸車再撞大板。

    講惡人，澳門唔算多，但亦唔算少，就以此停車場為例，見過唔少對頭車各不相讓，甚至幾乎講手。地底停車場又焗又，焗此類桑拿好易焗傷風，又何必走出車外戟指大駡，自討苦吃？

    長期泊此停車場，冇十年都有八載，見怪事不少，一架車泊兩個車位夠霸道，亦有人傻更更兩個位泊三架車，更有人佔用人家指定車位，唔到你唔服。幫襯咁耐，做工夫確方便唔少，慳回時間，但泊車銀両係咁散，少數怕長計，為搵食，除笨有精，冇計。但有時卻泊幾十皮，眞箇笨實加個箍矣！（轉自：澳門車元素）